“Bîn-á-tsài ài ē kì-tit khì ha̍k-hāu thè guá siu phue oo!”A-pa teh kā A-ka kóng.
“Hó, guá tsai--ah, tsí-sī siūnn-tio̍h thàu-tsá tō ài tshut-mn̂g guá tō kám-kak ē-thiám!”A-ka kóng kah teh gōng-sîn.
“Ài ah, lí sī khùn bô pá--oo!M̄-tsai-iánn lí sī teh pìnn siánn-mih báng neh!”A-bú kóng--tio̍h tō siūnn-khì.
“Bô lah! Ah tō tsuè-kīn bô-îng tāi-ha̍k ê tāi-tsì lah! Ah bô lí sī tòng -tsò guá teh pìnn siánn-mih khang--oo!”A-ka kóng liáu ū tsi̍t-tiám-á kui-pak-tóo hué.
“Ooh！Sī án-ne--oo! hó lah! sǹg A-bú gōo-huē lí, kā lí huē sit-lé lah!”A-bú kám-kak tsin pháinn-sè.
“Hó lah!Guá tsai-iánn lí tuì guá ê tāi-ha̍k sing-ua̍h bô liáu-kái, guá bē kā lí siūnn-khì lah hooh!”A-ka kā A-bú giú khì pinn-á sè-siann kóng.
A-pa sī tsi̍t-ê tī kok-sió kà Tâi-gí ê lāu-su, i tsiok siūnn beh kiò i ê gín-á A-ka khì tha̍k Tâi-bûn sóo, in-uī A-ka koh 1 tang tō beh pit-gia̍p ah! I siūnn beh kiò i thuân-sîng tsit-ê tsit-gia̍p, m̄-koh A-ka i sī tuì gē-su̍t tsit hong-bīn ū hìng-tshù, tshiūnn piáu-ián iah sī tsò tshiú-gē-phín, i lóng tsiok ū hìng-tshù--ê.
A-pa sim-lāi siūnn: “Ná-sī án-ne, mā bē-tàng bián-kióng i lah! M̄-koh A-ka tuì siá-tsok mā tsin ū hìng-tshù neh! Bô-it-tīng ē-tàng óng gē-su̍t ê Tâi-gí siá-tsok ooh!”Án-ne siūnn, A-pa hiông-hiông thóo tsi̍t ê tuā-khuì. A-bú khuànn--tio̍h, tō mn̄g A-pa i sī teh siūnn siánn-mi̍h huè.
Ám-sî-á, A-bú kā pn̄g-tshài tshuân hōo hó-sè--ah, tō kiò ta̍k-ê lâi tsia̍h-pn̄g.Toh-tíng ê tshài ū kàu tshenn-tshau, A-ka khuànn--tio̍h teh beh lâu tshuì nuā--á.
“A-bú lí tsú--ê tshài ū-kàu phang--ê, ing-àm tsit tǹg guá beh tsia̍h khah tsē leh. ”A-ka kóng-tio̍h tse, ba̍k-tsiu teh siám-sih.
Tsit-ke hué-á 3 ê lâng tsi̍t khai-sí teh tsia̍h-png lóng tiām-tsuh-tsuh, āu--lâi A-pa khui tshuì sing kóng: “A-ka, lí sī-m̄-sī tuì siá-tsok ū hìng-tshù ah?”
“Tio̍h ah, A-pa lí thài-ē tsai-iánn? ”A-ka ū tsi̍t-tiám-á m̄-kánn siong-sìn , uì A-pa ê tshuì kóng-tio̍h i ài tsò ê tāi-tsì.
“Guá ē kì-tit kū-nî 9--gue̍h kap kin-nî tshe, lí siá ê bûn-tsiunn ū hōo Bong-pò khan--tshut-lâi!”A-pa kóng kah ài tshiò.
A-pa suà--lo̍h-lâi koh kóng: “Lí sī-m̄-sī ū thau o̍h Tâi-gí--ah, lí hia o̍h ê tsheh sī khǹg tī guá tsheh-pâng lāi-té ê tsheh hoonnh?”
“A-pa, lí si̍t-tsāi siunn kuè lī-hāi ah! Guá kak-si̍t ū o̍h, ah tông-o̍h mā ū kā guá kà oo!”A-ka kóng kah bīn lóng âng--khì-ah!
“A-pa ǹg-bāng lí tha̍k Tâi-bûn sóo ê tāi-tsì lí kám-ū khó-lū?”A-pa suà--lo̍h-khì kóng.
“Guá kî-si̍t ū siūnn--kuè, m̄-koh guá siūnn beh tāi-ha̍k pit-gia̍p liáu-āu tō khì tsia̍h thâu-lōo neh! ”A-pa tsit-má sim-tsîng m̄-tsai-iánn án-ná khin-sang tsiok tsē ah!
“Guá tsai-iánn A-pa siūnn beh kiò guá uân-sîng i ê sim-guān, m̄-koh nā-sī tha̍k Tâi-bûn sóo, m̄-tsai kám-ē tsiok khùn-lân--bô?”A-ka sim-lāi teh siūnn tsit kiānn tāi-tsì.
Keh-kang thàu-tsá, A-ka khí-tshn̂g khì ha̍k-hāu thè A-pa siu-phue, i khuànn-tio̍h tsit tiunn phue siá Lô-má-jī Hia̍p-huē, kám-kak kóng uī-siánn-mi̍h Hia̍p-huē thài-ē kià tse hōo A-pa neh?
“Ah! Kám-kóng sī beh kiò i khì tsit ê Hia̍p-huē ê kàu-sik siōng-khò?”A-ka sim-lāi tī hia ioh.
“A-pa, guá thè lí siu--tio̍h ah, khe̍h hōo--lí--ooh！”A-ka siūnn tsi̍t-ē gāng--khì.
“A-ka to-siā lí ooh！Lí kā A-pa tàu-sann-kāng, tsán lah! ”A-pa muá-bīn tshun-hong.
A-pa tsit khe̍h--tio̍h, tō phah-khui lâi khuànn, lāi-té siá kóng: “Ko lāu-su lí hó, guá sī Lô-má-jī Hia̍p-huē ê Lîm--senn-sinn, siūnn beh iau-tshiánn lí tsò gún Tâi-gí su-tsu-pan ê káng-su, m̄-tsai-iánn lí kám ū ì-guān--bô? Lîm--senn-sinn kìng-khé. ”
A-pa ná khuànn-phue ná liām.Tsit sî, A-ka kiânn--kuè-lâi, tú-tú-á-hó hōo i thiann--tio̍h, sim-lāi siunn kóng, hōo guá ioh--tio̍h neh!
A-pa khuànn-tio̍h A-ka khiā tī i ê bīn-thâu-tsîng, tō beh kā kóng.Tsit sî, A-ka kā A-pa kóng: “Lí kóng--ê, guá lóng ū thiann--tio̍h ooh!”
A-pa khuànn suah liáu-āu, piàn tsò tsi̍t ê hó-tshiò-sîn, kài-sîng tit-tio̍h tuā-tsióng kâng-khuán.
“A-pa, tsit tiunn phue siá--ê kap guá ioh--tio̍h--ê kâng-khuán neh!”A-ka kóng kah tshuì khui khui.
“Lí si̍t-tsāi ū kàu guâ--ê, kám ū khó-lū ko beh tha̍k--khí-lih!”A-pa ba̍k-tsiu teh siám-sih.
“Hooh! A-pa mài it-ti̍t tshui lah! M̄-sī koh ū sî-kan ē-tàng khó-lū leh! ”A-ka kám-kak A-pa it-ti̍t kóng tsiok huân--ê.
A-pa khuànn-tio̍h A-ka ê bīn-tshiunn pháinn khuànn--ah, tō m̄-kánn koh mn̄g ah!
（Tsi̍t tang kuè khì--á）
A-ka í-king siūnn hó beh tsia̍h siánn mih thâu-lōo, tō sī tsò Tâi-gí bûn-huà ê pian-tsi̍p, ē-tàng kòo-tio̍h hìng-tshù mā ē-sái uân-sîng A-pa ê sim-guān, tse kiò tsò i kiam jī kòo, bong lâ-á kiam sé khòo lah!
I tsò ê khang-khuè hām A-pa sóo siūnn--ê kâng-khuán.
In pê-á-kiánn sim sī sio-thong--ê ooh!
Āu-lâi, sui-bóng A-ka tsiām-sî bô beh tha̍k khah kuân--ê, m̄-koh tuì A-pa lâi kóng í-king sī tsi̍t ê tsiok hó ê tāi-tsì ah!
A-pa ê sim-guān(阿爸的心願)聲音檔
歡迎大家來聽台語學台文寫台文
留言列表
台語文章(Tâi-gí bûn-tshiunn) (4)
